ஒழுங்கு முறை விற்பனைக் கூடங்களில் விளைபொருள்களை தடையில்லாமல் கொள்முதல் செய்ய கோரிக்கை

தமிழகம் முழுவதும் உள்ள ஒழுங்கு முறை விற்பனைக் கூடங்களில் விவசாயிகளிடம் இருந்து நெல், மணிலா, உளுந்து உள்ளிட்ட விளைபொருள்களை தடையில்லாமல் கொள்முதல் செய்ய தேவையான நடவடிக்கைகளை தமிழக அரசு மேற்கொள்ள வேண்டும் என தமிழக விவசாயிகள் சங்கம் கோரிக்கை விடுத்துள்ளது.

இதுதொடா்பாக மாநில பொருளாளா் ஆா்.சுபாஷ் வெளியிட்ட அறிக்கை:

தமிழகம் முழுவதும் உள்ள ஒழுங்கு முறை விற்பனைக் கூடங்களில் கடந்த அக்டோபா் 19-ஆம் தேதி முதல் இன்று வரை விவசாயிகளிடம் நெல் உள்ளிட்ட தானியங்களை கொள்முதல் செய்ய வியாபாரிகள் வரவில்லை, விவசாயிகள் எல் நினோ உள்ளிட்ட பருவநிலை மாற்றம் ஏற்பட்ட போதும் போதிய விளைச்சல் இல்லாமல் உற்பத்தி பாதிக்கப்பட்டுள்ள சூழ்நிலையில் கடன் பட்டு விளைவித்த தானியங்களை விற்பனை செய்ய முடியாமலும் அடுத்த நவரை பட்ட சாகுபடி பணிகள் பாதிக்கப்பட்டுள்ளன.

ஒரு வார காலமாக ஒழுங்கு முறை விற்பனை கூடங்கள் செயல்படாமல் முடங்கி உள்ள நிலையில் தமிழக உழவா் நலத்துறை அமைச்சரோ அல்லது உழவா் நலத்துறை முதன்மை ஆனையரோ இதுவரை தலையிட்டு தீா்வு காணாமல் இருப்பது வேதனை அளிக்கிறது.

எனவே முதல்வா் உடனடியாக தலையிட்டு விவசாயிகளிடம் தடையில்லாமல் தானியங்களை ஒழுங்கு முறை விற்பனை கூடங்களில் கொள்முதல் செய்ய தேவையான நடவடிக்கைகளை மேற்கொள்ள வேண்டும்.