இந்தியாவிலிருந்து மாம்பழ இறக்குமதிக்கு கட்டுப்பாடுகள்: நேபாளம்

அதிகஅளவில் பூச்சிக்கொல்லி மருந்துகள் கலந்திருப்பதாகக் கூறி இந்தியாவில் இருந்து மாம்பழங்களை இறக்குமதி செய்ய நேபாளம் கட்டுப்பாடு விதித்துள்ளது. இதனால், அங்கு உள்நாட்டு மாம்பழங்களின் விற்பனை அதிகரித்துள்ளது.

இது தொடா்பாக அந்நாட்டின் மாதேஷ் மாகாண வேளாண்மை கூட்டுறவு, நில மேலாண்மை அமைச்சக தகவல் தொடா்பு அதிகாரி அஜய் கியாவாலி கூறியதாவது:

மாதேஷ் மாகாண எல்லை வழியாகவே இந்தியாவில் இருந்து நேபாளத்துக்கு அதிக அளவில் மாம்பழங்கள் கொண்டுவரப்படுகின்றன. இந்திய மாம்பழங்களில் அதிக அளவில் பூச்சிக்கொல்லி மருந்து கலப்பு இருப்பது கண்டறியப்பட்டது. எல்லையில் அது தொடா்பான சோதனைகள் நடத்த போதுமான வசதிகள் இல்லை. எனவே, இந்திய மாம்பழங்களை இறக்குமதி செய்ய கட்டுப்பாடுகள் விதிக்கப்பட்டுள்ளன.

மேலும், இந்தப் பருவத்தில் இந்திய விவசாயிகளுடன் உள்நாட்டு விவசாயிகளால் போட்டியிட முடியவில்லை. ஏனெனில், இந்தியாவில் அதிக விளைச்சல் காரணமாக விலை குறைவாகவே கிடைக்கிறது. இப்போதைய கட்டுப்பாடுகள் மூலம் நேபாள மாம்பழங்களின் விற்பனை அதிகரித்துள்ளது. அதே நேரத்தில் நாடு முழுவதும் விற்பனை செய்ய உள்நாட்டு விளைச்சல் போதுமானதாக இல்லை என்றாா்.