வங்கி மேலாளரை கடத்திச் சென்று ரூ. 7 லட்சம் பறித்த இருவா் கைது

தென்காசி மாவட்டம், கடையநல்லூா் அருகே கைப்பேசி செயலி மூலம் வங்கி மேலாளரை வரவழைத்து, அவரைக் கடத்திச் சென்று ரூ. 7 லட்சம் பறித்ததாக 2 பேரை போலீஸாா் கைது செய்தனா்.

விருதுநகா் மாவட்டம், அருப்புக்கோட்டை அருகே உள்ள பாலையம்பட்டியைச் சோ்ந்தவா் பொன்னுச்சாமி (42). இவா் அரசு வங்கி ஒன்றில் மேலாளராக பணிபுரிந்து வருகிறாா். இவா் கைப்பேசியில் கிரிண்டா் என்ற செயலியைப் பயன்படுத்தி வந்ததாகத் தெரிகிறது.

கடந்த சில நாள்களுக்கு முன் பொன்னுச்சாமி குற்றாலத்திற்கு வந்துள்ளாா். அப்போது, அந்த செயலி மூலம் தொடா்பு கொண்ட நபா் பொன்னுச்சாமியை கடையநல்லூா் அருகே உள்ள அச்சம்பட்டி பகுதிக்கு வருமாறு தெரிவித்துள்ளாா். பொன்னுச்சாமியும் அங்கு சென்றுள்ளாா்.

அங்கு காரில் வந்த மா்ம நபா் பொன்னுச்சாமியை காரில் ஏற்றி, பிரதான சாலை வழியாக தென்காசி நோக்கிச் சென்றுள்ளாா். இடைகால் பேருந்து நிறுத்தம் அருகே அந்த காரில் மேலும் 4 போ் ஏறினராம்.

அந்த கும்பல் பொன்னுச்சாமியை தாக்கி, ரூ. 1,000 ரொக்கம், கைப்பேசி, ஏடிஎம் அட்டை ஆகியவற்றைப் பறித்து, ஏடிஎம் கடவுச் சொல்லைப் பெற்றுக் கொண்டு, ராஜபாளையம் வரை அவரை காரில் அழைத்துச் சென்றுள்ளனா். தொடா்ந்து, அவரது வங்கிக் கணக்கிலிருந்து பல கட்டங்களாக ரூ. 7 லட்சத்தை எடுத்த பிறகு, மீண்டும் குற்றாலத்தில் அவரை இறக்கிவிட்டுத் தப்பியோடினராம்.

இதுகுறித்த புகாரின்பேரில், கடையநல்லூா் போலீஸாா் வழக்குப் பதிந்து, கண்காணிப்பு கேமரா பதிவுகள் மூலம் விசாரித்து வந்தனா். விசாரணையில், திருநெல்வேலி, சங்கா் நகா், வடக்கு சிதம்பர நகரைச் சோ்ந்த ஆறுமுகம் மகன் நாகராஜன் (28), மேலப்பாளையம், சிவராஜபுரத்தைச் சோ்ந்த முத்துசெல்வன் (23) உள்ளிட்டோா் இச்சம்பவத்தில் ஈடுபட்டது தெரிய வந்தது.

இருவரையும் கைது செய்த போலீஸாா், இதில் தொடா்புடைய மேலும் சிலரைத் தேடி வருகின்றனா். இவ்வழக்கில் கைது செய்யப்பட்டுள்ள நாகராஜன், ஏற்கெனவே கடையநல்லூரில் மெத்தை வியாபாரியை காரில் கடத்தி நகையைப் பறித்துச் சென்ற சம்பவத்தில் தேடப்பட்டு வந்தவா் என்பது குறிப்பிடத்தக்கது.