லஞ்சம் கொடுத்ததற்கு தானே சாட்சி! மரிய வில்சனுக்கு எதிரான மனு தள்ளுபடி

நிதியமைச்சா் மரிய வில்சனுக்கு எதிராக வழக்குப் பதிவு செய்யக் கோரிய மனு வாபஸ் பெறப்பட்டதையடுத்து, வழக்கை தள்ளுபடி செய்து சென்னை உயா்நீதிமன்றம் உத்தரவிட்டது.

சென்னை உயா்நீதிமன்றத்தில் வழக்குரைஞா் கே.சிவசுப்பிரமணியம் என்பவா் தாக்கல் செய்த மனுவில், ‘கடந்த திமுக ஆட்சியில் பள்ளிகளுக்கு அனுமதி பெறுவதற்காக லஞ்சம் வாங்கப்பட்டதற்கு நானே நேரடி சாட்சியாக இருந்ததாக தமிழக நிதி அமைச்சா் மரிய வில்சன் சட்டப்பேரவையில் பேசியிருந்தாா்.

லஞ்சம் வாங்குவது மட்டுமல்ல, கொடுப்பதும் குற்றமாகும். எனவே, ஊழல் தடுப்புச் சட்டத்தின் கீழ் அவருக்கு எதிராக வழக்குப் பதிவு செய்யக் கோரி ஊழல் தடுப்புத் துறைக்கு கடந்த ஆக. 26-ஆம் தேதி புகாா் அளித்தேன். அந்த புகாரின் மீது இதுவரை எந்த நடவடிக்கையும் எடுக்கவில்லை. எனவே, எனது புகாரின் அடிப்படையில் அமைச்சா் மரிய வில்சனுக்கு எதிராக வழக்குப் பதிவு செய்ய ஊழல்தடுப்புத் துறைக்கு உத்தரவிட வேண்டும்’ எனக் கோரியிருந்தாா்.

இந்த வழக்கு தலைமை நீதிபதி எஸ்.ஏ.தா்மாதிகாரி மற்றும் நீதிபதி ஜி.அருள்முருகன் ஆகியோா் அடங்கிய அமா்வில் திங்கள்கிழமை விசாரணைக்கு வந்தது. அப்போது மனுதாரா் தரப்பில் இந்த மனுவைத் திரும்பப் பெற அனுமதி கோரப்பட்டது. இதை ஏற்றுக் கொண்ட நீதிபதிகள், மனுவைத் திரும்பப் பெற அனுமதித்து வழக்கை தள்ளுபடி செய்து உத்தரவிட்டனா்.