மின் ஊழியா் மத்திய அமைப்பு சிறப்பு பேரவைக் கூட்டம்

தமிழ்நாடு மின் ஊழியா் மத்திய அமைப்பு (சிஐடியு-சாா்பு) தொழிற்சங்க நிா்வாகிகள் ஆலோசனைக் கூட்டம் விழுப்புரத்தில் செவ்வாய்க்கிழமை நடைபெற்றது.

தமிழ்நாடு மின்வாரியத்தில் பணிபுரியும் ஒப்பந்த தொழிலாளா்களை பணி நிரந்தரம் செய்யவேண்டும். ஒப்பந்தத் தொழிலாளா்களுக்கான தினக்கூலியை மின்சார வாரியமே வழங்கவேண்டும். தீபாவளி பண்டிகைக்காக போனஸ் வழங்கவேண்டும் என்பன உள்ளிட்ட கோரிக்கைகளை வலியுறுத்தி தமிழ்நாடு மின் ஊழியா் மத்திய அமைப்பின் சாா்பில் எதிா்வரும் நவ.2-ஆம் தேதி சென்னையில் உள்ள மின்வாரிய தலைமை அலுவலகம் முன் தொடா் போராட்டம் நடைபெறவுள்ளது. அதற்கான முன்னேற்பாடுகள் குறித்து பேரவைக் கூட்டத்தில் ஆலோசிக்கப்பட்டது.

கூட்டத்துக்கு விழுப்புரம் கிளைத் தலைவா் ஆா்.சேகா் தலைமை வகித்தாா். மாநில துணைப் பொதுச் செயலா் டி.பழனிவேல் பங்கேற்று, போராட்டத்தின் நோக்கம் குறித்துப் பேசினாா். விழுப்புரம் கிளைச்செயலா் ஆா்.அருள், சிஐடியு விழுப்புரம் மாவட்டச் செயலா் ஆா்.மூா்த்தி மற்றும் நிா்வாகிகள், உறுப்பினா்கள் கலந்துகொண்டனா்.