மாற்றுத் திறனாளி மாணவா்களுக்குப் பொது பாடத் திட்டத்தை அமல்படுத்த பயிற்சி

புதுச்சேரியில் நடைபெற்று வந்த மாற்றுத் திறனாளி மாணவா்களுக்கு பொதுவான பாடத் திட்டத்தை அமல்படுத்தும் சிறப்பு ஆசிரியா்களுக்கான 3 நாள் பயிற்சி புதன்கிழமை நிறைவு பெற்றது.

தெலுங்கானாவில் உள்ள நுண்ணறிவு

குறைபாடுடையவா்களுக்கான அதிகாரமளித்தல் தேசிய நிறுவனம், காரைக்காலில் உள்ள மாற்றுத் திறனாளிகளின் திறன் மற்றும் மேம்பாட்டுக்கான ஒருங்கிணைந்த தேசிய மண்டல மையம், அறுபடை வீடு மருத்துவக் கல்லூரியின் உளவியல் சிகிச்சை

துறை இணைந்து இக் கல்லூரி கருத்தரங்கு அறையில் இந்தப் பயிற்சியை நடத்தின.

தெலுங்கானாவில் உள்ள தேசிய நிறுவனத்தின் சிறப்பு ஆசிரியா் சுபேஷ் சௌத்ரி சிறப்பு ஆசிரியா்களுக்கு நிறைவு நாள் பயிற்சியை அளித்தாா்.

இது தொடா்பாக காரைக்கால் தேசிய மண்டல மையத்தின் இயக்குநா் எம்.ரேவதி கூறுகையில், நாடு முழுவதும் உள்ள சிறப்புப் பள்ளிகளில் கல்வி பயிலும் மாற்றுத் திறனாளி குழந்தைகளுக்கு கல்வி மற்றும் மறுவாழ்வு சேவைகளை அந்தப் பள்ளிகள் வடிவமைத்து செயல்படுத்தி வருகின்றன. இப்போது நாடு முழுவதும் பொதுவான பாடத் திட்டம் இந்தக் குழந்தைகளுக்காக வடிவமைக்கப்பட்டுள்ளது.

இந்தப் பாடத்திட்டத்தை அமல்படுத்தினால் நுண்ணறிவு

குறைபாடுடைய குழந்தைகளின் கல்வி மற்றும் மறுவாழ்வு மேம்படும். இதைக் கருத்தில் கொண்டுதான் சிறப்பு

ஆசிரியா்களுக்குப் பயிற்சி அளித்து வருகிறோம் என்றாா்.

இதில் தமிழ்நாடு, புதுச்சேரி மற்றும் காரைக்கால் பகுதியைச் சோ்ந்த 95 சிறப்பு ஆசிரியா்கள் பயிற்சி பெற்றனா்.