அரசு ஒப்பந்ததாரா்கள் நூதனப் போராட்டம்

விருத்தாசலம் அருகே கம்மாபுரம் மற்றும் நல்லூா் ஊராட்சி ஒன்றியங்களில் தேசிய ஊரக வேலை உறுதித் திட்டத்தின் கீழ் மேற்கொண்ட பணிகளுக்கான நிலுவைத் தொகையை வழங்கக் கோரி, அரசு ஒப்பந்ததாரா்கள் புதன்கிழமை பிச்சை எடுக்கும் நூதனப் போராட்டத்தில் ஈடுபட்டனா்.

கம்மாபுரம் மற்றும் நல்லூா் ஊராட்சி ஒன்றியங்களில் தேசிய ஊரக வேலை உறுதித் திட்டத்தின் கீழ் பல்வேறு பணிகளை அரசு ஒப்பந்ததாரா்கள் மேற்கொண்டனா். பணிகள் அனைத்தும் நிறைவடைந்த நிலையில், அதற்கான தொகை கடந்த 2 ஆண்டுகளுக்கும் மேலாக வழங்கப்படவில்லை.

நிலுவைத் தொகையை வழங்கக் கோரி, மாவட்ட ஆட்சியா் மற்றும் சென்னையில் உள்ள ஊரக வளா்ச்சித் துறை கூடுதல் இயக்குநா் உள்ளிட்ட சம்பந்தப்பட்ட அதிகாரிகளை பலமுறை நேரில் சந்தித்து மனு அளித்தும், இதுவரை உரிய நடவடிக்கை எடுக்கப்படவில்லை எனக் கூறப்படுகிறது.

இதையடுத்து, விருத்தாசலம் ஊராட்சி ஒன்றிய அலுவலகம் முன் ஒப்பந்ததாரா்கள் கையில் தட்டு மற்றும் துண்டுடன் பிச்சை எடுக்கும் போராட்டத்தில் ஈடுபட்டனா்.

தொடா்ந்து, ஊராட்சி ஒன்றிய அலுவலகத்துக்குள் சென்ற அவா்கள், அதிகாரிகளிடம் கையேந்தி பிச்சை எடுத்தும் போராட்டத்தில் ஈடுபட்டனா். அப்போது, தங்களுக்கு வழங்க வேண்டிய நிலுவைத் தொகையை உடனடியாக வழங்க சம்பந்தப்பட்ட அதிகாரிகள் நடவடிக்கை எடுக்க வேண்டும் என வலியுறுத்தினா்.