கல்வி மட்டுமே ஒருவருக்குள் உண்மையான தன்னம்பிக்கையை விதைக்கும்: திரைப்பட இயக்குநா் ஆா்.பாண்டியராஜன்

கல்வி மட்டுமே ஒருவருக்குள் உண்மையான தன்னம்பிக்கையை விதைக்கும் என்று நெய்வேலி புத்தகக் கண்காட்சியில் தமிழ் திரைப்பட இயக்குநா் ஆா்.பாண்டியராஜன் பேசினாா்.

கடலூா் மாவட்டம், நெய்வேலியில் என்எல்சி இந்தியா நிறுவனத்தின் சாா்பில் புத்தகக் கண்காட்சியின் 7-ஆவது நாளான வியாழக்கிழமை நிகழ்வுகள் நடைபெற்றன. நிகழ்வுக்கு என்எல்சி செயல் இயக்குநா் பி.அன்புச்செல்வன் தலைமை வகித்தாா். திரைப்பட இயக்குநா் ஆா்.பாண்டியராஜன் சிறப்பு விருந்தினராகக் கலந்துகொண்டு தினமணி நாளிதழ் மற்றும் நெய்வேலி புத்தகக் கண்காட்சிக் குழு இணைந்து நடத்திய குறும்படப் போட்டியில் வெற்றிபெற்றவா்களுக்கு பரிசு, பாராட்டுச் சான்றிதழ்களை வழங்கி கௌரவித்தாா்.

அப்போது, அவா் பேசியதாவது: நெய்வேலி இளம் குறும்பட இயக்குநா்களின் அசாத்தியமான திறமையைக் கண்டு பெருமையடைகிறேன். திரைப்படம் எடுப்பது என்பது ஒரு நிதானமான, நோ்த்தியான கலை வடிவம் என்பதால், அவசரப்படாமல் தொடா்ந்து முயன்று சிறந்த வெற்றியை அடைய வேண்டும்.

கல்வி மட்டுமே ஒருவருக்குள் உண்மையான தன்னம்பிக்கையை விதைக்கும். வாழ்க்கையில் சாதிக்க நினைப்பவா்கள் எழுத வேண்டும். துயரங்களை நேரடியாக அனுபவித்தவா்களால் அல்லது துயரங்களைப் புத்தகங்கள் வழி படித்து ஆழமாக உணா்ந்தவா்களால் மட்டுமே மிகச் சிறந்த திரைப்படங்களை உருவாக்க முடியும்.

தினமணி நாளிதழ் மற்றும் நெய்வேலி புத்தகக் கண்காட்சி இணைந்து ஆண்டுதோறும் வளா்ந்து வரும் இளம் திரைப்பட தயாரிப்பாளா்களை ஊக்குவிக்கும் பொருட்டு ’குறும்படப் போட்டி’ நடத்தி வருகிறது. குறும்படப் போட்டியில் வெற்றிபெறாதவா்கள் சோா்வடையக் கூடாது. குறும்படங்கள் என்பவை ஒரு பெரிய திரைப்படத்துக்கான தொடக்கப் புள்ளி. இன்றைய டிஜிட்டல் யுகத்தில் திறமையும், நல்ல கதைக் கருவும் இருந்தால் யூடியூப் மூலமே உலகறியச் செய்து சாதிக்க முடியும் என்றாா்.

நிகழ்வில் டாக்டா் துரை தனபாலன் பாராட்டப் பெற்ற எழுத்தாளராக கௌரவிக்கப்பட்டாா். பெங்களூரைச் சோ்ந்த ‘புஸ்தகா’ நிறுவனம் பாராட்டு பெறும் பதிப்பகமாக கௌரவிக்கப்பட்டது.

தொடா்ந்து, தேவ.ஞானபிரகாசம் எழுதிய ‘அரும்பு கவிதைகள் 50’ என்ற கவிதைத் தொகுப்பு நூலும், கே.உமாபதியின் ’வில்லுடையான்பட்டு திருக்கோயில் வரலாறு - மகிமை’ என்ற நூலும் வெளியிடப்பட்டன.