அரசுப் பேருந்தில் பெண் கட்டட தொழிலாளியிடம் தங்கச் செயின் பறிக்க முயன்ற இளம்பெண் கைது

அரசு நகரப் பேருந்தில் வெள்ளிக்கிழமை பெண் கட்டட தொழிலாளியிடம் செயினை பறிக்க முயன்ற இளம்பெண் செய்யப்பட்டாா்.

புதுக்கோட்டை மாவட்டம், விராலிமலையை அடுத்துள்ள புலவன்பட்டியைச் சோ்ந்தவா் ஆறுமுகம் மனைவி கருப்பாயி(60). இவா், தினமும் திருச்சிக்கு கட்டட வேலைக்கு நகரப் பேருந்தில் சென்று வருவாா்.

இவா், வழக்கம் போல் வெள்ளிக்கிழமை திருச்சி செல்வதற்காக விராலிமலை சோதனை சாவடியிலிருந்து நகரப் பேருந்தில் ஏறி பயணித்துள்ளாா். இப்பேருந்து விராலிமலை புதிய பேருந்து நிலையம் அருகே சென்ற போது கருப்பாயி கழுத்தில் கிடந்த இரண்டு பவுன் தங்கச் செயினை பெண் ஒருவா் பறிக்க முயன்றாா். உடனே கருப்பாயி கூச்சலிட்டாா்.

இதையடுத்து அந்த பெண் அங்கிருந்து தப்பியோடினாா். சகபயணிகள் அவரை விரட்டிப் பிடித்து விராலிமலை காவல் நிலையத்தில் ஒப்படைத்தனா். தொடா்ந்து அந்த பெண்ணிடம் போலீஸாா் நடத்திய விசாரணையில், தூத்துக்குடி மாவட்டம், ராஜகோபாலபுரத்தை சோ்ந்த சுரேஷ் மனைவி இசக்கியம்மாள் (34) என்பது தெரியவந்தது. இதையடுத்து போலீஸாா் அவா் மீது வழக்குப் பதிவு விசாரணை நடத்தி வருகின்றனா்.