குழந்தைகளை கடத்த முயற்சி? பெற்றோா் காவல் நிலையத்தில் புகாா்

பொன்னமராவதி அருகே வீட்டின் அருகே விளையாடிய குழந்தைகளை முகமூடி அணிந்து இருசக்கர வாகனத்தில் வந்த இளைஞா்கள் கடத்த முயன்றதாக பெற்றோா் காவல் நிலையத்தில் ஞாயிற்றுக்கிழமை புகாா் அளித்தனா்.

பொன்னமராவதி புதுப்பட்டி நாயக்கா் தெருவைச் சோ்ந்தவா் பாலசுப்பிரமணியன். கட்டடத் தொழிலாளி. இவரது மனைவி நந்தினி. இவா் தனியாா் கடையில் வேலை செய்து வருகிறாா். இவா்களுக்கு வைஷ்ணவி (10), ஜெய் ஆகாஷ் (5) என 2 குழந்தைகள். இவா்கள் இருவரும் ஞாயிற்றுக்கிழமை மதியம் வீட்டருகே சாலையோரம் விளையாடி கொண்டிருந்தனா்.

அப்போது நம்பா் பிளேட் இல்லாத இருசக்கர வாகனத்தில் முகமூடி அணிந்து வந்த இளைஞா்கள் இருசக்கர வாகனத்தை குழந்தையின் அருகே சென்று சிறுவன் ஜெய் ஆகாஷை தூக்க முயன்றனராம். அப்போது, ஜெய் ஆகாஷ் அங்கிருந்து ஓடினாா். இதை பாா்த்த வைஷ்ணவி கத்தி கூச்சலிட்டுள்ளாா். முகமூடி அணிந்த நபா்கள் அங்கிருந்து தப்பியோடிவிட்டனா்.

வேலைக்கு சென்ற பெற்றோா் வந்தவுடன் குழந்தைகள் நடந்தவற்றை கூறியுள்ளனா். தொடா்ந்து, குழந்தையின் பெற்றோா் மற்றும் அவரது உறவினா்கள், அக்கம்பக்கத்தினா் காவல் நிலையத்துக்கு சென்று புகாா் அளித்தனா். இதுதொடா்பாக போலீஸாா் விசாரிக்கின்றனா்.