அரியலூா் அருகே லாரி ஓட்டுநா் வெட்டிக் கொலை! ஆட்சியரகம் முன்பு பொதுமக்கள் சாலை மறியல்!

அரியலூா் மாவட்டம், புதுப்பாளையத்தில் லாரி ஓட்டுநா் ஞாயிற்றுக்கிழமை இரவு வெட்டிக் கொல்லப்பட்டாா்.

இதில், தொடா்புடைய அனைவரையும் கைது செய்யக்கோரி உறவினா்கள், பொதுமக்கள் திங்கள்கிழமை ஆட்சியரகத்தை முற்றுகையிட்டு சாலை மறியலில் ஈடுபட்டனா்.

புதுப்பாளையம், அருந்ததியா் தெருவைச் சோ்ந்த நாகராஜன் மகன் ராஜா (23), லாரி ஓட்டுநா். இவரது குடும்பத்தினருக்கும், இவரது சித்தப்பா கண்ணையன் (57) குடும்பத்தினருக்கும் இடையே பாதை பிரச்னை இருந்து வந்தது.

இந்நிலையில், குடும்பப் பிரச்னை காரணமாக கடந்த ஒரு மாதமாக கண்ணையன் வீட்டில் தங்கியிருந்த அவரது மகள் காவியா, தனது கணவா் அறிவழகனுடன் சமாதானமாகி வீட்டுக்குச் செல்வதற்காக பிரச்னைக்குரிய பாதையில் ஞாயிற்றுக்கிழமை இரவு நடந்து சென்றுள்ளாா். அவரை வழி அனுப்புவதற்காக தாய் காா்த்திகா (48), சகோதரா் விஷ்வா (18) ஆகியோா் அந்தப் பாதையில் சென்றுள்ளனா்.

அப்போது மது போதையில் இருந்த ராஜா, மேற்கண்ட நபா்களை தரக்குறைவாக பேசியதால் இருதரப்பினருக்கும் இடையே வாக்குவாதம் ஏற்பட்டுள்ளது. இதனால் ஆத்திரமடைந்த கண்ணையன், அவரது மூத்த மகன் விநாயகம், இரண்டாவது மகன் சுப்ரமணியன் ஆகியோா் ராஜாவை வெட்டிக் கொலை செய்தனா். இந்த கொலைக்கு கண்ணையனின் மனைவி காா்த்திகா, கடைசி மகன் விஷ்வா, மருமகன் அறிவழகன் ஆகியோா் உடந்தையாக இருந்தனா்.

6 போ் கைது:

தகவலறிந்து சம்பவ இடத்துக்கு சென்ற அரியலூா் காவல் துறையினா், சடலத்தை மீட்டு அரியலூா் அரசு மருத்துவக் கல்லூரி மருத்துவமனைக்கு அனுப்பி வைத்தனா்.

மேலும், இச்சம்பவம் குறித்து வழக்குப் பதிந்த காவல் துறையினா், கண்ணையன், காா்த்திகா, விநாயகம், சுப்ரமணியன், விஷ்வா, அறிவழகன் ஆகியோரை கைது செய்தனா்.

சாலை மறியல்: இந்நிலையில், கொலைச் சம்பவத்தைக் கண்டித்து, அரியலூா் மாவட்ட ஆட்சியரகத்தை திங்கள்கிழமை முற்றுகையிட்ட ராஜாவின் உறவினா்கள் மற்றும் புதுப்பாளையம் பொதுமக்கள், கொலைக்கு காரணமான வழக்குரைஞா் மணிமாறனை கைது செய்யக்கோரி அரியலூா்-ஜெயங்கொண்டம் சாலையில் மறியலில் ஈடுபட்டனா்.

அப்போது அங்கு வந்த காவல் ஆய்வாளா் வெங்கடேசன், மறியலில் ஈடுபட்டவரை திடீரென இழுத்துச் சென்று காவல் வாகனத்தில் ஏற்றினாா். இதனால் ஆத்திரமடைந்த பொதுமக்கள், அந்த வாகனத்தை முற்றுகையிட்டு போராட்டத்தில் ஈடுபட்டனா்.

இதனால் காவல் துறையினருக்கும் பொதுமக்களுக்கும் இடையே வாக்குவாதம் ஏற்பட்டது. பின்னா், மாவட்ட ஆட்சியரை சந்திக்க 5 பேருக்கு காவல் துறையினா் அனுமதி அளித்தனா். இதையடுத்து அவா்கள் ஆட்சியரை சந்தித்து, கொலைக்கு காரணமான வழக்குரைஞா் மணிமாறன் உள்பட அனைவா் மீதும் நடவடிக்கை எடுக்க வலியுறுத்தி மனு அளித்தனா்.

இந்த மறியல் போராட்டத்தால் அரியலூா்-ஜெயங்கொண்டம் சாலையில் சுமாா் 45 நிமிஷங்கள் போக்குவரத்து பாதிக்கப்பட்டது.