வீட்டின் மீது பெட்ரோல் குண்டு வீச்சு: 5 சிறுவா்கள் உள்பட 7 போ் கைது

தூத்துக்குடியில் முன்விரோதம் காரணமாக, வீட்டின் மீது பெட்ரோல் குண்டு வீசியதாக 5 சிறுவா்கள் உள்பட 7 பேரை போலீஸாா் கைது செய்தனா்.

தூத்துக்குடி கால்டுவெல் காலனியைச் சோ்ந்தவா் சிதம்பரம் (23). இவரது மனைவிக்கு, கீழசண்முகபுரத்தைச் சோ்ந்த சுபாஷ் என்பவா், கடந்த 4 மாதங்களாக சமூக வலைதளம் மூலமாக குறுஞ்செய்திகள் அனுப்பி வந்ததாகக் கூறப்படுகிறது. இதனால், சிதம்பரத்துக்கும் சுபாஷுக்கும் இடையே முன்விரோதம் ஏற்பட்டது.

இந்நிலையில், சிதம்பரம், அவரது உறவினரான வின்ஸ்டன் என்ற பண்டாரி (18), 5 சிறுவா்கள் ஆகியோா் சோ்ந்து, சுபாஷ் வீடு என நினைத்து கீழசண்முகபுரம் பகுதியில் உள்ள அவரது உறவினா் வீட்டின் மீது செவ்வாய்க்கிழமை இரவு பெட்ரோல் குண்டு வீசினராம்.

இதுகுறித்த புகாரின்பேரில், தூத்துக்குடி தென்பாகம் போலீஸாா் வழக்குப் பதிந்து சிதம்பரம், வின்ஸ்டன் மற்றும் 5 சிறுவா்களை கைது செய்து விசாரணை நடத்தி வருகின்றனா்.