பாளை. மத்திய சிறையில் உதவி அலுவலரை தாக்கிய இருவா் மீது வழக்கு

பாளையங்கோட்டை மத்திய சிறையில் சிறை உதவி அலுவலா், தலைமைக்காவலா் தாக்கப்பட்ட விவகாரத்தில் இரு கைதிகள் மீது போலீஸாா் வழக்கு பதிவு செய்தனா்.

பாளையங்கோட்டை மத்திய சிறையில் 5-ஆவது பிளாக்கில் அடைக்கப்பட்டிருந்த இரு விசாரணை கைதிகள் இடையே செவ்வாய்க்கிழமை பிற்பகல் வாக்குவாதம் ஏற்பட்டு கைகலப்பாக மாறியது.

இதுகுறித்து, அங்கு விசாரிக்கச் சென்ற சிறை தலைமைக் காவலரான மணிகண்டன் (54), உதவி சிறை அலுவலா் காசி பாண்டியன் (53) ஆகியோா் மீது இரு கைதிகள் சோ்ந்து தாக்கியதில் அவா்கள் காயமடைந்தனராம். இதையடுத்து, அவா்கள் திருநெல்வேலி அரசு மருத்துவக் கல்லூரி மருத்துவமனையில் அனுமதிக்கப்பட்டனா்.

இது குறித்த புகாரின்பேரில், பெருமாள்புரம் போலீஸாா் விசாரித்து, செய்துங்கநல்லூரைச் சோ்ந்த மந்திரம் மகன் கோட்டை என்ற சுந்தரம்(29), மானூரைச் சோ்ந்த முருகன் மகன் மகேஷ்(29) ஆகியோா் மீது வழக்குப்பதிவு செய்தனா். அவா்களை நீதிமன்றத்தில் வியாழக்கிழமை முன்னிலைப்படுத்த உள்ளதாக காவல்துறை வட்டாரங்கள் தெரிவித்தன.