மானூா், சுத்ததமல்லி அருகே 3.5 கிலோ கஞ்சா பறிமுதல்: சிறாா் உள்பட 6 போ் கைது

மானூா், சுத்தமல்லி அருகே விற்பனை செய்வதற்காக பதுக்கிவைக்கப்பட்டிருந்த 3.5 கிலோ கஞ்சாவை போலீஸாா் பறிமுதல் செய்து, சிறாா் உள்பட 6 பேரை திங்கள்கிழமை கைது செய்து விசாரித்து வருகின்றனா்.

திருநெல்வேலி மாவட்டம், மானூா் காவல் நிலைய சரகத்துக்குள்பட்ட பகுதியில் போலீஸாா் ரோந்து பணியில் ஈடுபட்டனா்.

அப்போது சீதைக்குறிச்சி பாலம் அருகே சந்தேகத்துக்கிடமான வகையில் நின்றுகொண்டிருந்த 4 பேரை பிடித்து சோதனையிட்டனா். சோதனையில், அவா்கள் சுமாா் 2 கிலோ 30 கிராம் கஞ்சாவை விற்பனை செய்வதற்காக பதுக்கி வைத்திருந்தது தெரியவந்தது.

இதையடுத்து, கஞ்சாவை பறிமுதல் செய்த போலீஸாா், இதுகுறித்து வழக்குப் பதிந்து, குறிச்சிகுளம் பகுதியைச் சோ்ந்த ஷேக் சுபோ்(23), சீதைக்குறிச்சி பகுதியைச் சோ்ந்த அல்தாப் (19), முகமது சாலிக்(18), ஒரு சிறாா் ஆகிய நான்கு பேரை திங்கள்கிழமை கைது செய்தனா்.

1.5 கிலோ பறிமுதல்...

பேட்டை அருகேயுள்ள நரசிங்கநல்லூா் காட்டுப்பகுதியில் கஞ்சா விற்பதாக சுத்தமல்லி போலீஸாருக்கு தகவல் கிடைத்ததாம். அதன்பேரில் போலீஸாா் அங்கு சென்றபோது 2 போ் கஞ்சா விற்பனையில் ஈடுபட்டது தெரியவந்தது.

விசாரணையில் அவா்கள், தென்காசி மாவட்டம், வாசுதேவநல்லூரைச் சோ்ந்த செல்வக்குமாா் (19), தளவாய்புரத்தைச் சோ்ந்த வீரமணி (20) என்பது தெரியவந்தது. இதையடுத்து அவா்களை கைது செய்த போலீஸாா், அவா்களிடமிருந்து 1.5 கிலோ கஞ்சாவை பறிமுதல் செய்தனா்.