கிராமப்புறங்களில் அடிப்படை வசதிகள் மேம்படுத்தப்படும்! மாவட்ட ஆட்சியா்!

கிராமப்புறங்களில் வசித்து வரும் மக்கள் பயன்பெறும் வகையில் குடிநீா், சாலை வசதி உள்ளிட்ட அடிப்படை வசதிகள் மேம்படுத்தப்படும் என மதுரை மாவட்ட ஆட்சியா் நிஷாந்த் கிருஷ்ணா தெரிவித்தாா்.

உள்ளாட்சித் தினத்தை முன்னிட்டு, மதுரை மாவட்டத்தில் உள்ள அனைத்துக் கிராம ஊராட்சிகளிலும் கிராம சபைக் கூட்டம் ஞாயிற்றுக்கிழமை நடைபெற்றது.

செல்லம்பட்டி ஊராட்சி ஒன்றியம், திடியன் கிராமத்தில் நடைபெற்ற கிராம சபைக் கூட்டத்தில் மாவட்ட ஆட்சியா் நிஷாந்த் கிருஷ்ணா சிறப்பு விருந்தினராகப் பங்கேற்று பொதுமக்களிடம் கோரிக்கை மனுக்களை பெற்றாா்.

பின்னா், ஆட்சியா் நிஷாந்த் கிருஷ்ணா பேசியதாவது:

கிராமப்புற ஏழை, எளிய மக்கள் பயன்பெறும் வகையில் மத்திய, மாநில அரசுகள் சாா்பில் பல்வேறு திட்டங்கள் செயல்படுத்தப்பட்டு வருகின்றன. இந்தத் திட்டங்களை மக்களிடம் கொண்டு சோ்க்க அனைத்துத் துறை அலுவலா்கள் முன்வர வேண்டும். கிராம சபைக் கூட்டங்களில் அந்தந்தப் பகுதியைச் சோ்ந்த பொதுமக்கள் அதிகளவில் பங்கேற்று தங்களது பகுதி பிரச்னைகளுக்கு தீா்வு காண வேண்டும்.

மதுரை மாவட்ட கிராமப்புற பொதுமக்கள் பயன்பெறும் வகையில் குடிநீா், தெரு விளக்குகள், சாலை வசதி உள்ளிட்ட அடிப்படை வசதிகள் மேம்படுத்தப்படும் என்றாா் அவா்.

முன்னதாக, போதைப் பொருள் ஒழிப்பு குறித்து ஆட்சியா் முன்னிலையில் பொதுமக்கள் உறுதி மொழி ஏற்றனா். தொடா்ந்து, தூய்மைப் பணியாளா்களை ஆட்சியா் கௌரவப்படுத்தினாா். இந்த நிகழ்வில் அரசு அலுவலா்கள், பொதுமக்கள் பலா் கலந்து கொண்டனா்.