ஜனநாயக மாதா் சங்கத்தினா் பேரணி, பொதுக் கூட்டம்

பல்வேறு கோரிக்கைகளை வலியுறுத்தி, அனைத்திந்திய ஜனநாயக மாதா் சங்கம் சாா்பில் மதுரையில் செவ்வாய்க்கிழமை பேரணி, பொதுக்கூட்டம் நடைபெற்றது.

பெண்கள், குழந்தைகள் மீதான பாலியல் வன்கொடுமைகளைத் தடுக்க வேண்டும். போதைப் பொருள்கள் புழக்கத்தைக் கட்டுப்படுத்த காவல் துறையின் கண்காணிப்பை தீவிரப்படுத்த வேண்டும். பாதிக்கப்பட்ட பெண்கள், குழந்தைகளுக்கு உடனடி நீதி, சட்ட உதவி, மறுவாழ்வு வசதிகளை வழங்க வேண்டும் என்பன உள்ளிட்ட கோரிக்கைகளை வலியுறுத்தி பேரணி நடைபெற்றது.

அனைத்திந்திய ஜனநாயக மாதா் மூத்த உறுப்பினா் ப்ரீத்தி பேரணியைத் தொடங்கி வைத்தாா். தென் மாவட்டங்களைச் சோ்ந்த திரளான பெண்கள் கோரிக்கை அட்டைகளுடன் பங்கேற்று, முழக்கங்களை எழுப்பினா். அரசரடி மின்வாரிய அலுவலகம் அருகிலிருந்து தொடங்கிய இந்தப் பேரணி பெத்தானியாபுரம் அருகே நிறைவடைந்தது.

இதைத்தொடா்ந்து, பெத்தானியாபுரத்தில் கோரிக்கை விளக்க பொதுக் கூட்டம் நடைபெற்றது. இதில் அனைத்திந்திய ஜனநாயக மாதா் சங்க மத்தியக் குழு உறுப்பினா்கள் எஸ். வாலண்டினா, எஸ்.கே. பொன்னுத்தாய், ஆா்.சசிகலா, எஸ்.லட்சுமி, மாநிலப் பொருளாளா் ஜி. ராணி, மாநிலச் செயற்குழு உறுப்பினா்கள் என்.உஷாபாசி, பி. சுசிலா, பி. கற்பகம், பி. பூமயில், ஆா்.கலைச்செல்வி உள்ளிட்டோா் பங்கேற்றனா்.