ஒசூா் அருகே இளைஞரின் கைப்பேசியை ஹேக் செய்து ரூ. 1.26 லட்சம் திருட்டு

ஒசூா் அருகே குறுந்தகவல் மூலம் இளைஞரின் கைப்பேசியை ஹேக் செய்து அவரது வங்கி கணக்கிலிருந்து ரூ. 1.26 லட்சம் திருடப்பட்டது குறித்து போலீஸாா் விசாரித்து வருகின்றனா்.

கிருஷ்ணகிரி மாவட்டம், ஒசூா், ஆவலப்பள்ளி அட்கோ பகுதியை சோ்ந்தவா் சரத்குமாா் (36). இவரது கைப்பேசியின் வாட்ஸ்ஆப் எண்ணிற்கு கடந்த 27 ஆம் தேதி வட்டாரப் போக்குவரத்து அலுவலக (ஆா்டிஓ) இ-சலான் என்ற பெயரில் செயலியை பதிவிறக்கம் செய்யும் இணைப்பு, குறுந்தகவலாக வந்தது. இந்த செயலியை சரத்குமாா் பதிவிறக்கம் செய்தபோது, அவரது கைப்பேசி ஹேக் செய்யப்பட்டது.

இதை அறிந்த அவா் கைப்பேசியை அணைத்துவைத்தாா். பிறகு மீண்டும் கைப்பேசியை இயக்கியபோது அவரது வங்கி கணக்கில் இருந்து ரூ. 1,26,900 திருடப்பட்டது தெரியவந்தது. இதுகுறித்து கிருஷ்ணகிரி இணைய குற்றப்பிரிவு போலீஸாரிடம் சரத்குமாா் செவ்வாய்க்கிழமை புகாா் அளித்தாா். போலீஸாா் வழக்குப் பதிந்து விசாரணை நடத்தி வருகின்றனா்.