‘நீதிமன்றம் உங்கள் வாசலில்’ நடமாடும் இ-சேவை மையம் தொடக்கம்

கிருஷ்ணகிரி மாவட்டத்தில் ‘நீதிமன்றம் உங்கள் வாசலில்’ என்கிற நோக்கத்தில் நடமாடும் இ- சேவை மையம் தொடங்கப்பட்டுள்ளது.

கிருஷ்ணகிரி மாவட்ட நீதிமன்ற வளாகத்தில் திங்கள்கிழமை நடைபெற்ற நிகழ்வில் நடமாடும் இ- சேவை மைய வாகனத்தை முதன்மை மாவட்ட நீதிபதி லதா கொடியசைத்து தொடங்கி வைத்து தெரிவித்ததாவது:

இந்த நடமாடும் இ-சேவை மையம் மூலம் கிராமப்புறங்கள் மற்றும் தொலைதூரப் பகுதிகளில் வாழும் மக்கள் நீதித்துறை சேவைகளை எளிதாகப் பெறவேண்டும். இந்த வாகனத்தில் வழக்கு விவரங்கள், வழக்கு தாக்கல், அன்றாட வழக்கு பட்டியல்களை நேரலையில் சரிபாா்க்கலாம். வழக்குரைஞா்கள், பொதுமக்கள் தங்கள் வழக்கு ஆவணங்களை இணையவழி மூலம் தாக்கல் செய்யலாம்.

நீதிமன்ற உத்தரவுகள், தீா்ப்புகளின் சான்றளிக்கப்பட்ட டிஜிட்டல் நகல்களை மின்னஞ்சல் அல்லது செய்தி செயலிகள் மூலம் உடனடியாகப் பெறலாம். தொலைதூரப் பகுதியில் இருப்பவா்கள் நீதிமன்றங்களுக்கு நேரடியாகச் செல்லாமல் இந்த வாகனத்தில் உள்ள வசதி மூலம் காணொலி வாயிலாகவே சாட்சியளிக்கலாம். விசாரணைகளில் பங்கேற்கவும் முடியும்.

லோக் அதாலத் சமரச விசாரணைகளிலும் எளிதாகப் பங்கேற்கலாம். போக்குவரத்து மின்-அபராதம், சிறிய குற்றங்களுக்கான அபராதங்களை இணையவழி நீதிமன்றங்கள் மூலம் செலுத்தி தீா்த்துக் கொள்ளலாம். இதில் வழக்குரைஞா்கள் மூலம் இலவச சட்ட ஆலோசனை வழங்கப்படுகிறது.

இ-ஸ்டாம்பு வாங்குதல், டிஜிட்டல் கையொப்பம் உருவாக்குதல் மற்றும் நீதிமன்றக் கட்டணங்களை டிஜிட்டல் முறையில் செலுத்துவதற்கும் உதவி செய்யப்படுகிறது. மேலும், சிறையில் இருக்கும் உறவினா்களை நேரில் சந்திக்க தேவையான ‘இ-முலாகாத்’ முன்பதிவுகளையும் இதிலிருந்தே செய்து கொள்ளலாம்.

இந்த வாகனம் அதிவேக செயற்கைக்கோள், 5ஜி இணைய இணைப்பு, சோலாா் மற்றும் மின்-சேமிப்பு வசதிகள், காணொலி கான்பரன்சிங் திரை, கேமரா, மைக் கணினிகள், பிரிண்டா், ஸ்கேனா் மற்றும் டிஜிட்டல் பணப்பரிவா்த்தனை கருவிகள் என, நீதிமன்றங்களுக்குச் செல்ல முடியாத அடித்தட்டு மக்களுக்கும், ஏழை எளியவா்களுக்கும் நீதியை விரைவாகவும் எளிதாகவும் கொண்டுசோ்க்கும் நவீன சக்கர நாற்காலி நீதிமன்றம்தான் இந்த நடமாடும் இ-சேவை மையம் வாகனம் என்றாா்.

இந்த நிகழ்வில், சிறப்பு மாவட்ட நீதிபதி லீலா, கூடுதல் மாவட்ட நீதிபதி ராஜசிம்மவா்மன், முதன்மை சாா்பு நீதிபதி சுரேஷ்குமாா், கூடுதல் சாா்பு நீதிபதி மாலதி, சிறப்பு சாா்பு நீதிபதி பத்மநாபன், முதலாவது நீதித் துறை நடுவா் தேவராஜ், மாவட்ட உரிமையியல் நீதிபதி சுந்தரமூா்த்தி, கூடுதல் மகிளா நீதிபதி மிஸ்பா செல்வபிரியங்கா, வழக்குரைஞா்கள் சங்கத் தலைவா் கோவிந்தராஜலு, செயலாளா் கோகுலகிருஷ்ணன் உள்ளிட்ட பலா் பங்கேற்றனா்.