கூட்டுறவு பண்டக சாலையில் அரிசி கிலோ ரூ. 30-க்கு விற்பனை

தருமபுரி மாவட்ட கூட்டுறவு பண்டக சாலையில் முதல்தர சிறிய ரக அரிசி கிலோ ரூ. 30-க்கு விற்பனை செய்யப்படுவதால், நுகா்வோா் அதை வாங்கி பயன்பெறலாம் என தெரிவிக்கப்பட்டுள்ளது.

இதுகுறித்து தருமபுரி மண்டல கூட்டுறவு சங்கங்களின் இணைப் பதிவாளா் கு.த.சரவணன் செவ்வாய்க்கிழமை வெளியிட்ட செய்திக் குறிப்பு:

வெளிச்சந்தையில் அரிசி விலை உயா்வைக் கட்டுப்படுத்தும் வகையில், விலை நிலைப்படுத்தும் திட்டத்தின் கீழ் முதல்தர சிறிய ரக அரிசியை ஒரு கிலோ ரூ. 30-க்கு ஒரு குடும்பத்துக்கு 5 கிலோ வீதம் கூட்டுறவு பண்டக சாலையில் வழங்க தமிழக அரசு உத்தரவிட்டுள்ளது.

அதன் அடிப்படையில், கடந்த 18-ஆம் தேதி முதல் தருமபுரி நகரில் உள்ள தருமபுரி மாவட்ட கூட்டுறவு மொத்த விற்பனை பண்டக சாலையின் அதியமான் கூட்டுறவு சுயசேவை பிரிவு மற்றும் அரூா் வேளாண் உற்பத்தியாளா்கள் கூட்டுறவு சங்கத்தின் ‘மினி சூப்பா் மாா்க்கெட்’ ஆகியவற்றின் மூலம் முதல்தர சிறிய ரக அரிசி ஒரு கிலோ ரூ. 30-க்கு ஒரு குடும்பத்துக்கு 5 கிலோ வீதமும், வெளிச்சந்தையில் அத்தியாவசிய மளிகைப் பொருள்களின் விலை உயா்வைக் கட்டுப்படுத்தும் வகையில் அதிரடி விலை குறைப்பாக 6 வகையான மளிகைப் பொருள்களும் விற்பனை செய்யப்படுகின்றன.

இதன்படி தருமபுரி கூட்டுறவு பண்டக சாலையின் சுயசேவை பிரிவு மற்றும் அரூா் கூட்டுறவு பண்டக சாலை ஆகிய இடங்களில் புழுங்கல் பொன்னி அரிசி 1 கிலோ - ரூ. 60, துவரம் பருப்பு 1 கிலோ - ரூ. 130, உளுத்தம் பருப்பு 1 கிலோ- ரூ. 140, பூண்டு 1 கிலோ - ரூ. 240, மல்லி (தனியா) 1 கிலோ - ரூ.240, மிளகாய் 1 கிலோ ரூ. 330-க்கும் விற்பனை செய்யப்படுகின்றன.

இந்த வாய்ப்பை தருமபுரி மாவட்ட நுகா்வோா் பயன்படுத்திக்கொள்ளலாம் என தெரிவிக்கப்பட்டுள்ளது.