தோ்தல் ஆணையத்தை மத்திய அரசு தனது கட்டுப்பாட்டுக்குள் வைத்துள்ளது! - காங்கிரஸ் முன்னாள் தலைவா் கே.எஸ். அழகிரி

சுதந்திரமாக இயங்க வேண்டிய தோ்தல் ஆணையத்தை மத்திய அரசு தனது கட்டுப்பாட்டுக்குள் வைத்துள்ளது என்று தமிழ்நாடு காங்கிரஸ் கமிட்டியின் முன்னாள் தலைவா் கே.எஸ்.அழகிரி குற்றஞ்சாட்டியுள்ளாா்.

தலைமைத் தோ்தல் ஆணையா் ஞானேஷ்குமாா் பதவி விலக வலியுறுத்தி காங்கிரஸ் கட்சி நடத்தி வரும் போராட்டங்கள் குறித்து விளக்கும் வகையில், கோவை மாநகா் மாவட்ட காங்கிரஸ் கட்சி அலுவலகத்தில் கே.எஸ்.அழகிரி செய்தியாளா்களை ஞாயிற்றுக்கிழமை சந்தித்தாா்.

அப்போது, அவா் மேலும் கூறியதாவது:

தோ்தல் ஆணையம் எவ்வாறு ஜனநாயகத்தை சிதைத்துள்ளது, வாக்குத் திருட்டு எப்படி அரங்கேறியுள்ளது என்பது குறித்து மக்களவை எதிா்க் கட்சித் தலைவா் ராகுல் காந்தி விரிவாக பேசியுள்ளாா்.

எதிா்க்கட்சிகள் முன்வைக்கும் இத்தகைய தீவிர குற்றச்சாட்டுகளுக்கு மக்களவையில் பிரதமரோ அல்லது மத்திய உள்துறை அமைச்சரோ தெளிவான விளக்கம் அளிக்கவோ, வெள்ளை அறிக்கை வெளியிடவோ முன்வரவில்லை.

இந்திய அரசமைப்புச் சட்டத்தின் 324- ஆவது பிரிவின்கீழ் தோ்தல் ஆணையத்துக்கு விரிவான அதிகாரங்கள் வழங்கப்பட்டிருந்தாலும், அவை சட்ட திட்டங்களுக்குள்பட்டே பயன்படுத்தப்பட வேண்டும்.

தலைமைத் தோ்தல் ஆணையா் என்பவா் சமமான உறுப்பினா்களில் முதன்மையானவரே தவிர, அவருக்கு தனிப்பட்ட கூடுதல் அதிகாரங்கள் ஏதும் இல்லை. ஆணையத்தின் அனைத்து முடிவுகளும் ஒருமனதாகவோ அல்லது பெரும்பான்மை அடிப்படையிலோதான் எடுக்கப்பட வேண்டும்.

ஆனால், தலைமைத் தோ்தல் ஆணையா் ஞானேஷ்குமாா் ஏனைய இரண்டு தோ்தல் ஆணையா்களின் கருத்துகளைப் புறந்தள்ளி தன்னிச்சையாகச் செயல்பட்டு வருகிறாா்.

வாக்காளா் சோ்க்கை, நீக்கத்துக்கான படிவம் 6-இல் உரிய மக்களவை நடைமுறைகள் இன்றி சட்டவிரோதமாக மாற்றங்கள் செய்யப்பட்டுள்ளன. இதற்கு எதிா்ப்பு தெரிவித்து மற்ற இரு ஆணையா்களும் மத்திய அமைச்சரவைச் செயலாளருக்கு கடிதம் எழுதியுள்ளனா் என்றாா்.