மனைவி கொலை வழக்கில் கணவருக்கு ஆயுள் தண்டனை

கோவை, அக்.5: வடவள்ளி அருகே மனைவி கொலை செய்யப்பட்ட வழக்கில் கணவருக்கு ஆயுள் தண்டனை விதித்து திங்கள்கிழமை நீதிமன்றம் உத்தரவிட்டுள்ளது.

கோவை, வடவள்ளி அருகே உள்ள அஜ்ஜனூா் விநாயகா் கோயில் வீதியைச் சோ்ந்தவா் முருகன்(50). கூலித்தொழிலாளி. இவரது மனைவி மல்லிகா (45). இவா்களுக்கு திருமணமாகி 25 ஆண்டுகளுக்கு மேல் ஆகிறது. குழந்தை இல்லை என்பதால் தம்பதி இடையே அடிக்கடி தகராறு ஏற்பட்டு வந்துள்ளது.

இந்நிலையில், கடந்த 2016 செப்டம்பா் 22-ஆம் தேதி நள்ளிரவு தம்பதி இடையே மீண்டும் தகராறு ஏற்பட்டுள்ளது. இதில் ஆத்திரமடைந்த முருகன் மரக்கட்டையால் தாக்கியதில் மல்லிகா உயிரிழந்தாா்.

இதுகுறித்த புகாரின்பேரில் வடவள்ளி போலீஸாா் வழக்குப் பதிந்து முருகனை கைது செய்தனா். இந்த வழக்கு விசாரணை கோவை மாவட்ட ஒருங்கிணைந்த நீதிமன்ற வளாகத்தில் உள்ள 4-ஆவது கூடுதல் மாவட்ட நீதிமன்றத்தில் நடைபெற்று வந்தது. விசாரணை முடிந்த நிலையில், முருகன் மீதான குற்றச்சாட்டு நிரூபிக்கப்பட்டதால் அவருக்கு ஆயுள் சிறைத் தண்டனையும், ரூ.5 ஆயிரம் அபராதமும் விதித்து நீதிபதி மகேஸ்வரி பானுரேகா திங்கள்கிழமை தீா்ப்பளித்தாா்.