ஐ.டி. நிறுவன ஊழியரிடம் வழிப்பறி

சுந்தராபுரம் அருகே நள்ளிரவில் ஐ.டி. நிறுவன ஊழியரை வழிமறித்து பணம் மற்றும் கைப்பேசியை பறித்துச் சென்ற 4 போ் கொண்ட கும்பலை போலீஸாா் தேடி வருகின்றனா்.

கோவை மாநகா், ஈச்சனாரி அருகே உள்ள வண்டியூா் ஏ.பி.எம்.நகா் பகுதியைச் சோ்ந்தவா் ஸ்ரீகிருஷ்ணா (21). இவா் அந்தப் பகுதியில் உள்ள தகவல் தொழில்நுட்ப (ஐ.டி.) நிறுவனத்தில் பணிபுரிந்து வருகிறாா். இவா் சனிக்கிழமை நள்ளிரவு வேலை முடிந்து நிறுவனத்தில் இருந்து பேருந்து நிறுத்தத்தை நோக்கி நடந்து சென்றுள்ளாா்.

அப்போது ஈச்சனாரி-செட்டிபாளையம் சாலையில் உள்ள தனியாா் கைப்பேசி கடை அருகே, ஆட்டோவில் வந்த 4 போ் கொண்ட மா்ம கும்பல் ஸ்ரீகிருஷ்ணாவை வழிமறித்து கைப்பேசி, கிரெடிட் காா்டு, அவரது ரகசிய குறியீட்டு எண்ணைப் பெற்று வங்கிக் கணக்கில் இருந்த ரூ.7,500 ஆகியவற்றை பறித்துவிட்டு தப்பினா்.

இதுகுறித்த புகாரின்பேரில் சுந்தராபுரம் போலீஸாா் வழக்குப் பதிவு செய்து, மா்ம கும்பல் குறித்து விசாரணை நடத்தி வருகின்றனா்.