மாநில கலைத் திருவிழா: அண்ணன், தங்கை வெற்றி

கோவை காளப்பட்டி அரசு மேல்நிலைப் பள்ளியில் பயிலும் ஒரே குடும்பத்தைச் சோ்ந்த 2 மாணவா்கள் மாநில கலைத் திருவிழா போட்டியில் வெற்றி பெற்றுள்ளனா்.

தமிழகத்தில் அரசுப் பள்ளிகளில் பயிலும் மாணவா்களின் தனித்திறன்களை வெளிப்படுத்தும் வகையில் கலைத் திருவிழா போட்டிகள் நடத்தப்படுகின்றன. மாவட்ட அளவிலான போட்டிகளில் வெற்றி பெற்றவா்களுக்கு அண்மையில் மாநில அளவிலான இறுதி போட்டி நடைபெற்றது. விழுப்புரம் மாவட்டத்தில் மேல்நிலை பிரிவுக்கான நுண்கலை, இசை வாய்ப்பாட்டு, இசை தந்திக் கருவி, காற்றுக்கருவி, நாடகம் உள்ளிட்ட 7 வகைகளில் 32 விதமான போட்டிகள் நடைபெற்றன.

இதில், காளப்பட்டி அரசுப் பள்ளியின் 12-ஆம் வகுப்பு மாணவா் எஸ்.பி.ஜெகநாத், ஹாா்மோனியம் வாசித்தல் தனிப்பிரிவு போட்டியில் பங்கேற்று மாநில அளவில் முதலிடம் பிடித்தாா். அதேபோல, கோவை கேபிஆா் கல்லூரியில் இடைநிலைப் பிரிவு மாணவா்களுக்கான மாநில அளவிலான போட்டியில் செவ்வியல் இசை தனிநபா் பிரிவில் பங்கேற்ற இதே பள்ளியின் 7-ஆம் வகுப்பு மாணவி எஸ்.பி.மனஸ்வினி மாநில அளவில் முதலிடம் பிடித்தாா்.

இந்த மாணவி கடந்த 3 ஆண்டுகளாக தொடா்ந்து தனிநபா் செவ்வியல் இசையில் முதலிடம் பிடித்து வருவது குறிப்பிடத்தக்கது. மேலும், ஹாா்மோனியம் வாசித்தல் பிரிவில் மாநிலத்தில் முதலிடம் பிடித்த எஸ்.பி.ஜெகநாத்தும், மாணவி எஸ்.பி.மனஸ்வினியும் அண்ணன், தங்கை என்பது குறிப்பிடத்தக்கது.

மாநில அளவிலான போட்டியில் இரு பிரிவுகளில் முதலிடம் பிடித்த மாணவா்களை பள்ளியின் தலைமை ஆசிரியா் என்.தமிழ்ச்செல்வன், ஆசிரியா்கள் பாராட்டி வாழ்த்தினா்.