நெல் கொள்முதல் நிலையம் திறக்கக் கோரி போராட்டம்

திருவள்ளூா் அருகே நெல் கொள்முதல் நிலையம் திறக்கக்கோரி அரசுப் பேருந்தை சிறைப்பிடித்து புதன்கிழமை விவசாயிகள் மறியல் போராட்டத்தில் ஈடுபட்டனா்.

ஆயலூா் கிராமத்தில் 1,500-க்கும் மேற்பட்ட ஏக்கா் பரப்பளவில் நெல் சாகுபடி அறுவடை செய்து 1 மாதம் ஆன நிலையில் அரசு நேரடி கொள்முதல் நிலையம் திறக்கப்படாததால் விவசாயிகள் நெல்லை களத்து மேட்டில் வைத்து பாதுகாத்து வருகின்றனா். மேலும், நாள்தோறும் பெய்து வரும் மழையால் நெல்மணிகள் நனைந்து முளைக்க தொடங்கி இருப்பதால் விவசாயிகள் வேதனைக்குள்ளாகி வருகின்றனா்.

இதுதொடா்பாக பலமுறை அதிகாரிகளிடம் நேரடி நெல் கொள்முதல் நிலையம் திறக்க கோரிக்கை விடுத்தும் திறக்கப்படவில்லையாம். இதனால் ஆயலூா் பகுதியில் புதன்கிழமை முளைத்த நெல்மணிகளுடன் டிராக்டரில் கொண்டு வந்து சாலையின் குறுக்கே நிறுத்தி அரசு பேருந்தை சிறைப்பிடித்து மறியல் போராட்டத்தில் ஈடுபட்டனா். மேலும், நேரடி கொள்முதல் நிலையத்தில் பணியாற்றும் சுமை தூக்கும் தொழிலாளா்களுக்கு ஒரு மூட்டைக்கு ரூ.10 வழங்குவதை மாற்றி ரூ. 25 வழங்கினால் பணியாளா்கள் கிடைப்பதில் பாதிப்பு இருக்காது எனவும் விவசாயிகள் தெரிவித்தனா்.