இளைஞர் காங்கிரஸ் மாநிலச் செயலாளர் இடைநீக்கம்!

இளைஞர் காங்கிரஸ் மாநிலச் செயலாளர் அலீம் அல் புஹாரி இன்று (மே 8) இடைநீக்கம் செய்யப்பட்டுள்ளார்.

தமிழக வெற்றிக் கழகத்துடன் காங்கிரஸ் கூட்டணி வைத்ததை கடுமையாக விமர்சித்ததைத் தொடர்ந்து இடைநீக்கம் செய்யப்பட்டுள்ளார்.

தமிழ்நாட்டிற்கு ராகுல் காந்தி வந்தபோது அவரின் உரையை அலீம் மொழிபெயர்த்திருந்தார். தொடர்ந்து காங்கிரஸ் கட்சியில் செயல்பட்டு வந்த இவர், தற்போது அக்கட்சியால் இடைநீக்கம் செய்யப்பட்டுள்ளார்.

தமிழக சட்டப்பேரவைத் தேர்தலில் 108 தொகுதிகளில் தமிழக வெற்றிக் கழகம் வெற்றி பெற்றுள்ளது. ஆட்சி அமைக்க பெரும்பான்மையாக 118 இடங்கள் தேவை என்பதால் இதர கட்சிகளின் ஆதரவை தவெக நாடி வருகிறது.

திமுக கூட்டணியில் இருந்து விலகி தவெகவுக்கு காங்கிரஸ் (5 எம்.எல்.ஏக்கள்) ஆதரவு தெரிவித்துள்ளதால், தவெகவின் உறுப்பினர்கள் எண்ணிக்கை 112 ஆக அதிகரித்துள்ளது.

இன்னும் 6 உறுப்பினர்கள் தேவை என்பதால், விடுதலைச் சிறுத்தைகள், மார்க்சிஸ்ட் கம்யூனிஸ்ட், இந்திய கம்யூனிஸ்ட் கட்சிகளுடன் தவெக பேச்சுவார்த்தையில் ஈடுபட்டு வருகின்றது.

இந்நிலையில், தமிழக வெற்றிக் கழகத்துடன் காங்கிரஸ் கட்சி கூட்டணி வைத்ததை, அலீம் அல் புஹாரி விமர்சித்துப் பேசியிருந்தார். இதன் விளைவாக தற்போது அக்கட்சியில் இருந்து இடைநீக்கம் செய்யப்பட்டுள்ளார்.