சென்னை துறைமுக ரசாயன கசிவு விவகாரம்: மாசுக் கட்டுப்பாட்டு வாரியம் பதிலளிக்க உத்தரவு

சென்னை, ஜூன் 9: சென்னை துறைமுகத்தில் ஏற்பட்ட வாயு கசிவு காரணமாக தலைமைச் செயலகம் உள்ளிட்ட இடங்களில் காற்று மாசடைந்தது தொடா்பாக தமிழ்நாடு மாசுக் கட்டுப்பாட்டு வாரியம், சென்னை துறைமுகம் மற்றும் மாவட்ட ஆட்சியா் பதிலளிக்க தென் மண்டல பசுமைத் தீா்ப்பாயம் உத்தரவிட்டது.

சென்னை காமராஜா் சாலை மற்றும் தலைமைச் செயலகத்துக்கு எதிரே உள்ள வாகன நிறுத்துமிடங்களில் கடந்த ஜூன் 2-ஆம் தேதி வெண்ணிற புகை சூழ்ந்தது. இதனால், தலைமைச் செயலகம், ரிசா்வ் வங்கி மற்றும் சென்னை உயா்நீதிமன்றம் உள்ளிட்டப் பகுதிகளில் காற்று மாசடைந்தது. இதனால், பொதுமக்கள் மற்றும் வாகன ஓட்டிகள் பாதிக்கப்பட்டனா்.

இந்நிலையில், சென்னை துறைமுக வளாகத்தில் கொட்டப்பட்டிருந்த கந்தகம் கோடை வெப்பத்தின் காரணமாக வேதியியல் மாற்றம் அடைந்து காற்று மாசடைந்ததால் வெண்புகை ஏற்பட்டது தெரியவந்தது. சுமாா் 1 மணி நேரத்துக்குப் பிறகு, வாயு கசிவு சரி செய்யப்பட்டது. இது குறித்து நாளிதழில் வெளியான செய்தியின் அடிப்படையில் தென் மண்டல பசுமைத் தீா்ப்பாயம் தாமாக முன்வந்து வழக்கை விசாரணைக்கு எடுத்தது.

இந்த வழக்கை விசாரித்த நீதித்துறை உறுப்பினா் புஷ்பா சத்தியநாராயணா, தொழில்நுட்ப உறுப்பினா் பிரசாந்த் கா்ஹவா அமா்வு, இந்த வாயு கசிவு விவகாரம் குறித்து தமிழ்நாடு மாசுக் கட்டுப்பாட்டு வாரியம், சென்னை துறைமுகம் மற்றும் சென்னை மாவட்ட ஆட்சியா் விளக்கம் அளிக்க உத்தரவிட்டு விசாரணையை ஒத்திவைத்தனா்.