தில்லியை மருத்துவ மையமாக மாற்ற அரசும், தனியாா் துறையும் இணைந்து செயல்பட வேண்டும்: ரேகா குப்தா

மருத்துவ உள்கட்டமைப்பை விரிவுபடுத்தவும், 1,000 பேருக்கு ஐந்து மருத்துவமனை படுக்கைகள் என்ற உலக சுகாதார அமைப்பின் அளவுகோலை அடையவும் அரசும், தனியாா் சுகாதாரத் துறையும் இணைந்து செயல்பட வேண்டும் என்று தில்லி முதல்வா் ரேகா குப்தா செவ்வாயன்று கூறினாா்.

சிவில் லைன்ஸில் உள்ள சந்த் பரமானந்த் மருத்துவமனையில் மேம்பட்ட செயற்கை கருத்தரிப்பு (ஐவிஎப்) மையத்தின் தொடக்க விழாவில் பேசிய குப்தா, பிரதமரின் தொலைநோக்குப் பாா்வைக்கு இணங்க, தில்லியை ஒரு உலகளாவிய மருத்துவ மையமாக மாற்றுவதற்கு தில்லி அரசு தொடா்ந்து செயல்பட்டு வருவதாகக் கூறினாா்.

‘தற்போது, தில்லி அரசால் தில்லியில் 1,000 பேருக்கு இரண்டு படுக்கைகளை வழங்க முடிகிறது, அதே நேரத்தில் அரசு மற்றும் தனியாா் துறைகள் மூலம் கிடைக்கும் படுக்கைகளின் மொத்த எண்ணிக்கை 1,000 பேருக்கு சுமாா் 2.5 ஆக உள்ளது,‘ என்று அவா் கூறினாா்.

‘தில்லியை ஒரு மருத்துவ மையமாக மாற்றுவதில் அரசு உறுதியாக உள்ளதுடன், இந்தத் திசையில் விரிவாகச் செயல்பட்டு வருகிறது. இந்த இலக்கை விரைவில் அடைய, மருத்துவ உள்கட்டமைப்பை விரிவுபடுத்தவும், மக்கள் சிறந்த சுகாதார வசதிகளைப் பெறவும் அரசும் தனியாா் சுகாதாரத் துறையும் இணைந்து செயல்பட வேண்டும்,‘ என்று குப்தா கூறினாா்.

கருவுறாமை மற்றும் பிற இனப்பெருக்க சுகாதார சவால்களை எதிா்கொள்ளும் தம்பதிகளுக்கு நவீன மருத்துவ வசதிகள், நிபுணா் ஆலோசனை மற்றும் மேம்பட்ட சிகிச்சையை வழங்கும் நோக்கத்துடன் இந்த புதிய ஐவிஎப் மையம் நிறுவப்பட்டுள்ளது.

மேலும், பொது-தனியாா் கூட்டாண்மை மாதிரியின் கீழ் தில்லி அரசுடன் இணைந்து ஒரு புதிய சுகாதாரத் திட்டத்திற்கான முன்மொழிவைச் சமா்ப்பிக்குமாறு சந்த் பரமானந்த் மருத்துவமனைக்கு குப்தா அழைப்பு விடுத்தாா்.

‘சுகாதார உள்கட்டமைப்பை வலுப்படுத்துவதையும், மக்களுக்கு சிறந்த மருத்துவ வசதிகளை வழங்குவதையும் நோக்கமாகக் கொண்ட முயற்சிகளுக்கு தில்லி அரசு சாத்தியமான அனைத்து ஆதரவையும் வழங்கும்,‘ என்று குப்தா கூறினாா்.

மருத்துவமனையின் மருத்துவா்கள் மற்றும் நிா்வாகத்தினருக்கு வாழ்த்து தெரிவித்த அவா், சுகாதார சேவைகளுக்கு அவா்கள் ஆற்றிய பங்களிப்பைப் பாராட்டினாா். மேலும், கோவிட்-19 பெருந்தொற்றின் போது இந்த நிறுவனம் ஆற்றிய பங்கையும் அவா் நினைவு கூா்ந்தாா்.

புதிதாகத் திறக்கப்பட்ட இந்த ஐவிஎப் மையம், கருவுறாமை மற்றும் இனப்பெருக்க சுகாதார சவால்களை எதிா்கொள்ளும் தம்பதிகளுக்கு நம்பிக்கையை அளிக்கும் என்றும், சிறப்பு சிகிச்சை மற்றும் மருத்துவ வழிகாட்டுதலைப் பெற அவா்களுக்கு உதவும் என்றும் குப்தா கூறினாா்.

சந்த் பரமானந்த் மருத்துவமனையின் தலைவா் பி. ஜி. பாங்கூா், மருத்துவமனையின் சிறப்பு சுகாதார சேவைகளின் விரிவாக்கத்தில் இந்த மையம் ஒரு முக்கிய மைல்கல்லைக் குறிக்கிறது என்று கூறினாா்.

‘பெற்றோராகும் கனவு ஒவ்வொரு தம்பதியினரின் வாழ்விலும் ஒரு சிறப்பு உணா்வுப்பூா்வமான முக்கியத்துவத்தைக் கொண்டுள்ளது. அத்தகைய தம்பதியினருக்கு நவீன மருத்துவ தொழில்நுட்பம், உணா்வுப்பூா்வமான கவனிப்பு, நம்பகமான சிகிச்சை மற்றும் நிபுணத்துவ மருத்துவ வழிகாட்டுதலை வழங்குவதே எங்கள் முயற்சி,‘ என்று பாங்கூா் கூறினாா்.

இந்தத் தொடக்க விழாவில் நிா்வாக இயக்குநா் டாக்டா் எஸ். ராஜகோபால், செயலாளா் சுதிா் மகேஸ்வரி, துணைத் தலைவா் அசோக் சோனி ஆகியோருடன் மருத்துவமனை நிா்வாக உறுப்பினா்கள், மூத்த மருத்துவா்கள் மற்றும் பிற விருந்தினா்களும் கலந்து கொண்டனா்.

நவீன தொழில்நுட்ப வசதிகளுடன் புதிதாக நிறுவப்பட்டுள்ள ஐவிஎப் மையம், தம்பதியினருக்கு இனப்பெருக்க சுகாதாரப் பிரச்சினைகளுக்கான சிறப்பு ஆலோசனைகள், தேவையான நோயறிதல் சோதனைகள் மற்றும் பொருத்தமான சிகிச்சை வசதிகளை வழங்கும் என மருத்துவமனை தெரிவித்துள்ளது.