மாணவா்களின் தனித்திறமைகளை வெளிக்கொணர கலைத் திருவிழா போட்டிகள்: கடலூா் ஆட்சியா் சிபி ஆதித்யா செந்தில்குமாா்

மாணவா்களின் தனித்திறமைகளை வெளிக்கொண்டு வரும் வகையில், கலைத் திருவிழா போட்டிகள் நடத்தப்பட்டு வருவதாக கடலூா் மாவட்ட ஆட்சியா் சிபி ஆதித்யா செந்தில்குமாா் தெரிவித்தாா்.

கடலூா் மாவட்ட பள்ளிக் கல்வித் துறை சாா்பில் மாவட்ட அளவிலான கலைத் திருவிழா போட்டிகள் ஆகஸ்ட் 21 முதல் 24-ஆம் தேதி வரை பல்வேறு இடங்களில் நடைபெறுகின்றன. இதன் தொடக்க நிகழ்ச்சி கடலூரில் உள்ள தனியாா் பள்ளியில் வெள்ளிக்கிழமை நடைபெற்றது.

மாவட்ட ஆட்சியா் சிபி ஆதித்யா செந்தில்குமாா் குத்துவிளக்கேற்றி விழாவைத் தொடங்கிவைத்து, மாணவா்களின் கலை நிகழ்ச்சிகளைப் பாா்வையிட்டாா். நிகழ்ச்சியில் ஆட்சியா் பேசியதாவது:

2026 - 27ஆம் கல்வியாண்டில் அரசு மற்றும் அரசு உதவி பெறும் பள்ளிகளில் பயிலும் மாணவா்களின் தனித்திறமைகளை வெளிக்கொண்டு வரும் நோக்கில், ‘இளையோா் திறன்’ என்ற கல்வி மையக்கருத்தின் அடிப்படையில் கலைத் திருவிழா போட்டிகள் நடத்தப்பட்டு வருகின்றன.

கடலூா் மாவட்டத்தில் 1 மற்றும் 2-ஆம் வகுப்பு, 3 முதல் 5-ஆம் வகுப்பு, 6 முதல் 8-ஆம் வகுப்பு, 9 மற்றும் 10-ஆம் வகுப்பு, 11 மற்றும் 12-ஆம் வகுப்பு என மாணவா்கள் 5 பிரிவுகளாகப் பிரிக்கப்பட்டு கலைப் போட்டிகள் நடத்தப்படுகின்றன. இதில், 9 மற்றும் 10-ஆம் வகுப்புகள் ஒரு பிரிவாகவும், 11 மற்றும் 12-ஆம் வகுப்புகள் மற்றொரு பிரிவாகவும் கொண்டு பள்ளி மற்றும் வட்டார அளவிலான போட்டிகள் நடத்தி முடிக்கப்பட்டுள்ளன.

இதைத் தொடா்ந்து, தற்போது மாவட்ட அளவிலான கலைத் திருவிழா போட்டிகள் நடைபெற்று வருகின்றன. மாவட்ட அளவிலான போட்டிகளில் தோ்வு செய்யப்படும் மாணவா்கள் மாநில அளவிலான கலைத் திருவிழா போட்டிகளில் பங்கேற்கும் வாய்ப்பைப் பெறுவா்.

கலைத் திருவிழா போட்டிகள் மூலம் மாணவா்களின் படைப்பாற்றல், தன்னம்பிக்கை, தலைமைத்துவம் உள்ளிட்ட பல்வேறு திறன்கள் மேம்படும். எனவே, மாணவா்கள் இதுபோன்ற போட்டிகளில் ஆா்வத்துடன் பங்கேற்று, தங்களது தனித்திறமைகளை வெளிப்படுத்த வேண்டும் என்றாா்.

இதில், மாணவா்களின் பல்வேறு கலைத் திறன்களை வெளிப்படுத்தும் வகையில் பல்வேறு போட்டிகள் நடைபெற்றன. மாவட்டத்தின் பல்வேறு பகுதிகளைச் சோ்ந்த மாணவா்கள் ஆா்வத்துடன் பங்கேற்று தங்களது திறமைகளை வெளிப்படுத்தினா்.

நிகழ்ச்சியில் முதன்மைக் கல்வி அலுவலா் மகாலட்சுமி, மாவட்டக் கல்வி அலுவலா் இஸ்மாயில் உள்ளிட்ட பள்ளிக் கல்வித்துறை அலுவலா்கள், ஆசிரியா்கள் மற்றும் மாணவா்கள் கலந்துகொண்டனா்.