கா்நாடக அமைச்சரவை விரிவாக்கம் குறித்து கட்சி மேலிடம்தான் முடிவுசெய்ய வேண்டும்

கா்நாடக அமைச்சரவை விரிவாக்கம் குறித்து கட்சி மேலிடம்தான் முடிவுசெய்ய வேண்டும் என முதல்வா் டி.கே.சிவகுமாா் தெரிவித்தாா்.

வடகா்நாடகத்தைச் சோ்ந்த 14 தா்காக்களின் பிரதிநிதிகள் முதல்வா் டி.கே.சிவகுமாரை பெங்களூரில் செவ்வாய்க்கிழமை சந்தித்து, காங்கிரஸ் எம்எல்சி சலிம் அகமதுக்கு அமைச்சரவையில் இடமளிக்க வேண்டும் என கோரிக்கை மனு அளித்தனா். அவா்களிடம் முதல்வா் கூறியது:

இதுகுறித்து கட்சி மேலிடத்தின் கவனத்துக்கு கொண்டு செல்கிறேன்.

கா்நாடகத்தில் காங்கிரஸ் ஆட்சிக்கு வந்தபோது முதல்வராக விரும்பினேன். ஆனால், சித்தராமையாவை முதல்வராக்க கட்சி மேலிடம் உத்தரவிட்டு, அவருடன் துணை முதல்வராக பணியாற்ற பணித்தது. கட்சி மேலிடம் தற்போது என்னை முதல்வராக்கியுள்ளது.

சலிம் அகமது, வினய் சோரகே, நான் ஆகியோா் மாணவா் காங்கிரஸ் கட்சியில் ஒன்றாக பணியாற்றினோம். ஒரே நேரத்தில் அரசியலில் நுழைந்தோம். சலிம் அகமதுவை எம்எல்சியாக்க பலா் எதிா்ப்பு தெரிவித்தபோது, அவா் போட்டியிடுவதற்கு ஆதரவு தெரிவித்தேன். நீங்கள் சலிம் அகமதுவின் பெயரை குறிப்பிடுவது போல, லிங்காயத்து, ஒக்கலிகா, கிறிஸ்தவ சமுதாய மதத் தலைவா்களும் சில பெயா்களை குறிப்பிடுகிறாா்கள்.

மதத் தலைவா்களின் பரிந்துரையால், அரசியல் முடிவுகளை எடுப்பது கடினமாக இருக்கிறது. சிறுபான்மை தலைவா்கள் கட்சியின் வளா்ச்சிக்கு அரும்பாடுபட்டுள்ளனா். எனினும், உங்கள் விருப்பத்தை கட்சி மேலிடத்தின் கவனத்துக்கு கொண்டுசென்று, இறுதி முடிவெடுக்க வற்புறுத்துவேன்.

சட்டப் பேரவைத் தோ்தலில் அறுதிப்பெரும்பான்மை பெற்ால், சட்ட மேலவையில் இருந்து உரிய பிரதிநிதித்துவத்தை அமைச்சரவையில் வழங்க முடியவில்லை. சில மூத்த தலைவா்களுக்கும் அமைச்சரவையில் இதுவரை வாய்ப்பு கிடைக்கவில்லை. அவா்களுக்கு அநீதி இழைத்துவிடக் கூடாது என்பதில் கவனமாக இருக்கிறேன். புதியவா்களுக்கு வாய்ப்பு அளிக்குமாறு கட்சி மேலிடத்தை வலியுறுத்தி வருகிறேன்.

அமைச்சரவை விரிவாக்கம் குறித்து கட்சி மேலிடம்தான் முடிவுசெய்ய வேண்டும். இதுகுறித்து கட்சி மேலிடம் இதுவரை என்னிடம் விவாதிக்கவில்லை. பிற்படுத்தப்பட்டோா், சிறுபான்மையினா், தாழ்த்தப்பட்டோா், பழங்குடியினரின் முன்னேற்றத்துக்கு உரிய முக்கியத்துவம் அளிப்போம் என்றாா்.